شا يبين ...فى كوتشينة
...............
على هامش الصفحة
عملت مِـسوَدة
حطيت سنين العمر
وبدأت افنَّـطها
ورق ...فى كوتشينة
أول سنة ف عمرى
لما بدأت اعرف
فى الدنيا
نوع تانى
قالوا.. اسمها أنى
سالب وموجب ليه ؟
وفهمت بعديها
لكن اللى ما فهمتوش
مين فينا كان سالب ؟
مين فينا كان موجب ؟
وبدون ما كنت اقصد
سالب جذب موجب
موجب جذب سالب
ونهاية كات واحدة
جربت أول جرح
حسّيت بكسر القلب
وسنين كتير عدت
قررت اعيش وحدى
موجب بلا سالب
لكن يا كوتشينة
الدنيا حزنانة
أيامنا مسكينة
البنت ظهرت لى
حلوة بتتبسِّــم
وانا الولد عاشق
جرحى القديم .. شيلته
ع السطر حطيته
وقفلته بالأقواس
وسطورى فى الهامش
مسوَدة ....مِـسـوِدّة
وسنين تعدى سنين
قررت ما أعدش
كل الموجب ..سالب
يا قلبى هس ...بلاش
إقفل فى كوتشينتك
هـِـدّ الهامش وامسـَـح
مسودة الصفحات
شوف صفحة وافتحها
لوّنها ..لون لونك
تفرح ....وفـرَّحها
وورقة
ورا ...ورقة
وآخر الأوراق
يا كوتشينة عمرى
أرقام كتير ...ألوان
بتمر على صدرى
منها اللى بيعبَّـر
منها اللى بيفكر
بشيبة الأيام
بضلمة الأحلام
هاتى آخر ..ورقة
ما العمر كله قمار
يمكن ..أكون كسبان
لو مرة فى حياتى
وان حتى اكون خسران
أنا راضى ..بخسارتى
ورقة ... وجات شايب
صورة لأيامى
ملامحه من لونى
يمكن يكون ...شكلى
ومش بعيد أبداً
أطلع أنا ....هو
وابقى ..أنا وهو
شايبين فى كوتشينة
....................
بـــقـــلـــــــــم ا لـــشــــا عـــــر
أ بــــو عـــمـــــــــــا ر ا لـــمــــصــــــــرى
السبت مارس 26, 2016 1:34 am من طرف حسين محمد
