.......شئ م الألم
في حبك شئ م الندم
في حبك شئ م الألم
في حبك سكرت المعاني
واتولدت حقيقة م العدم
.....
من غير فلسفة جيتلك
بقلب طفل تركته عندك
طالب وصل هوي قلبك
زرعت حب حصاده ندم
....
وف سكتك مشيت سنين
تايه ف ضحكة تشبه الأنين
ويكدب قلبي دي بسمة حنين
أقرب القي الفرح فيها ألم
......
سقيت عشقك بدمع المطر
وفضلت علي أرضك بأنتظر
يطرح هواكي لحن ووتر
طلعت غنوتي للي اتظلم
.....
سهرت ليلك علي وعدك
لميت حروف عشقي عندك
مش طالب منك غير وصلك
من غيري ف هواكي اتصدم
....
ما هربتش يوم من حبك
ما كتبتش يوم لغير عشقك
ما سهرت ليل الا في دربك
وكان حصادي ف حبك ألم
.....
ولسة لهواكي باكتب غنوتي
ولسة لعينيكي ماشية سكتي
ولسة شايف فيكي بس دنيتي
رغم ان صوتي ف حبك اتكتم
.....
صرخة عشق مكتومة جوايا
حكاية حب تاهت عنها النهاية
زي عمري صعب تبقاله حكاية
نداهة قالت مين ف عشقي اتظلم
......
الأولة وكان ياما كان انتي
والتانية هنت وانتي ما هنتي
والتالتة لسة ف عينيكي مدينتي
والرابعة جوا قبر قلب اتهدم
.................................................أيمن بلال
السبت مارس 26, 2016 1:34 am من طرف حسين محمد
