الوطنُ الأحـَــد
دلقت روحى ع الورق
حبة حروف
سلسلت ريحتك فى السطور
مطبوعة صورتك فى الوريد
لفيت على كل البحور
نشفت ملح الجرح
على آخر رصيف
وقفِـت مركب غربتك
على خطوتين منى
كل اللى جايين م السفر
شايلين بواقى الحلم
فى جيوب الشنط
شموا الملوحة فى الورق
وشطوط بتغرق فى العرق
ختموا تصاريح الدخول
وقرروا العودة
يا مدنة يا شاهدة
قومى اشهدى واستشهدى
ورددى أو.... عددى
أن لا سبيل سوى الوطن
وأن الحب رسول حياة
يا من تغازلُ بالسلاح ربيعـَنا
يا من تهادنُ بالخنوعِ
على مشارف حلمـِنا
دماؤنا ..سالت هنا
واحنا اللى واهبين الوطن
مواويل رجوع
قوموا امسحوا كل الدموع
دقوا الجرس
وارفع يا شيخنا الصوت
ولا تخاف من حرس
ما راح خلاص زمن الخرس
سمعنا حىِّ على الجهاد
سمعنا حىِّ على البلاد
روحى الغريبة ..
ردّت الروح فى الجسد
واجدل حبال الموت ..مسـَد
لكل من خان أو جلد
اهى فتّحت شمس الصباح
لسة الوطن مليان براح
ويساع جميع العاشقين
الموجوعين ...الشقيانين
وف حضنـُه لامم دمعنا
وبإيده طبطب جرحنا
لو كنا نبتة من ترابه وميـِّتـُه
هو أكيد واخد ملامحه مننا
يا كل بصمة ع الرصيف
وطننا مش أنثى
وطننا مش مـَلكة
ولا مـمـلـَكـــة
جايبين لها مليون وصيف
وطننا راجل وابن رجالة عـُمـَــد
قوموا انفضوا تقل الغبار
واتمسّحوا ف قلب الخضار
وطننا جنة ..
للى حنى روحه واستأنى
حط إيده ف إيد ولاده
واستعننا....
بالأحد
قل هو الوطن الأحد
لا ف يوم ظلم
ولا كان يجور ولا مـُستـَبـِّـد
إن ما مرَّ من عمرِ الوطن
فلتحسبوهُ كابوس ....مِحـَن
ولتحذفوه من الدفاتِرِ كلـِّها
وتوضأوا من نيله نبع الحنان
وارفع بلال بصوتـِك...
مليون آذان
صلى بنا وابدأ بفاتحة الكتاب
واتبع بسورة البلد
..........
بـقـلــــــم ا لـــشـــــــا عــــــــــر
أ بــــــو عــــمـــــــــا ر ا لـــمـــصـــــــــــــــر ى
السبت مارس 26, 2016 1:34 am من طرف حسين محمد
