جــــــــايـــــــــــــــــــــــــــز
كلمة
زرعِتها شفايفى العطشانة
على أوراق صفحات أيامك
بتدوّر فيكى
على بسمة تبل شفايفى
تستنّـى ف يوم
ما الحلم يقابل أحلامِك
كلمة ..
لـفّت تجاويف حواريكى ولياليكى
تِـتشعبَط على شجرة صفصا ف
تِـطلع ما تخاف
تِـتنَـطط
على تقاسيم الغيط لاخضر
ويّـا المحرات
و تلف تدوَّر مع ساقية هناك
على راس الغيط ..
.تِـغطس فى الميّـة وتِـتـلعبط
تِـتبَـل حروفها ف عِـز البرد
فرحانة ...ودفيانه
وتطير من شفّة على شفّة
.......بلبل خِـفـّــة
وتحُـط النغمة ف مواويلك
وتخش قهاوى الحارة الكمشانة ف حضن الدخّـان
تدخل بسلام ...تخرج بسلام
وتسلّـم ع السِّـت مليحة بتاعة الترمس
ف ودانها بتِـلعَب وبتِـهمِـس
تضحك ..تضحك ..
ضِحكة مليحة
تدّحرج ع السكة الواصلة لحدّ عنيكى
وتبوس رِمشك وتهنـّيكى
وتشوف فيكى أحلى ما فيكى
مش كلمة شوق وغرام ....
وحنين وهيام
دى ف بُـرج حمام ....قلب عشوشه
وتحنّـى عيون الزغلولة
وتروح لهناك ع البنيّـة
تختار زغلول صافى النيّـة
وتجمَّـعهُـم
كلمة ..
ع النخلة المدبوحة جدورها
تروح تواسيها ...
.تِـجمَـع شرايينها ..تداويها
وتحُـط الشريان ع الشريان
ووريـــد فى وريـــد....
.وترد أكيد
الروح فيها
تكبر ..تطرح ..ترمى رُطَـبها
على كل ولاد الحىِّ الجعانين
كلمة
خرجت من أنفاس صدرى المخنوقة
كلمة تطرّى شفايف قلبى المشقوقة
كَـرمِـشها جفاف الوقت الغرقان
فى مطامع ومزاعم
من كل ملوك الغربان
كلمة على ورقة قلبى احلم بيها
تخرج من سجن سطورها تجيب شمسِـك
وتزيح الليل بحروف واثقة
ترفع حسّــك.....إرفعى حسّــك
تدّى العايز ..وال مِش عايز
كلمة بقولها ..يِمكن توصَل
يمكن ..........جـــايـز
.....................
بــقـــلـــــم ا لـــشـــــا عـــــــــــر
أ بــــــو عـــمــــــــــا ر ا لـــمـــصـــــــر ى
السبت مارس 26, 2016 1:34 am من طرف حسين محمد
