لـعـــبــــــــــة شـــمــس
................
مـاشية البت بست سنين
تلعب بالشمس ف كف إديها
تفتح صوابعها ..تعديها
تقفل ..تحجبها وتضحك
وتشوفنى باشوف ضـِحكـِتها
بتدارى الضحكة ف كف إديها
وف قلب الشمس تخبيها
تجرى
خطاويها تسابق الضل المتمدد
تفرح
والضل خياله يعاود تانى ويسبقها
ضفايرها الـ ...داخلة سباق
مين فيهم
تلمس كتف الناحية التانية
ضفايرها تلـَمـَّع نور الشمس
وتزغلل عين العـُشـّاق
البت بست سنين
خـَطـَفـِت قلبى ولعبـِت بيه
وقعدت اراقبها
وانا خايف قلبى يضيع منها
تدخل ..تتدارى فى ستارة شيفون
وانا حاسس
قلبى ف إيدها زى المجنون
خايف لا عليها يهون
ترميه م البلكونة
البت بست سنين
شـَبـِّت على طراطيف صوابعها
شـَبـَكـِت قلبى مع المنديل
على حـبـل غسـيــل
وانا خايف نسمة هوا تلعب بيها
والشمس على الحبل تميـِّل
وتبوس أطراف المنديل
والبت بتلعب بالمنديل
وتهز الحبل ..يصرخ قلبى ويتنطط
خايف ينزل مع نقطة مية
م البلكونة
والبت شقية ...ومجنونة
ياما نفسى أمد عيونى
جوة دماغها
أعرف على إيه ناوية
تمنعنى شرايط ضفايرها
وعيونى بتتكعبل فيها
البت بست سنين
سابت قلبى المتشعلق
ع الحبل وغابت
تاهت جوة الأوضة
واستنى تشيل المنديل
وترد لى قلبى تريحنى
أو تبعت ضحكة تفرحنى
نسيتنى وغابت
زى الشمس اللعبة ما غابت
وسابتنى ف حيرتى
لا انا طايل قلبى
ولا حتى خيالها بضفايرها
راضى يعدّى
وبكف إديها المتدفّـّى بنور الشمس
تـِلـمـِس خـَدّى
مع بوسة بطعم التوتة البـِكريـَّة
إصحى يا با با
الساعة ستة
.............
بــقــــلـــــم ا لـــشـــــــا عـــــــــر
أ بــــو عــــمــــــــا ر ا لـــــمـــــصـــــــــر ى
السبت مارس 26, 2016 1:34 am من طرف حسين محمد
