يا حَرّ أغسطس—ل د/صبرىإسماعيل

يا حَرّ أغسطس—ل د/صبرىإسماعيل
*******
ياحرّ أغسطس كفاية عرق
سعادتك بترقص وإحنا فى قلق
ماهمّك آلامنا ولا اللى اتحرق
ولا اللى بمزارع يعانى الشقا
يا حرّ أغسطس كفاية بقا
******
ياحرّ أغسطس كفاية عناد
وفضلا تراعى ظروف الولاد
وترحم بلادى وكل البلاد
وهنشيل جميلك لحين اللقا
يا حرّ أغسطس كفاية بقا
*****
لانافع مراوح ولا فتح باب
وخفت المكيّف يزيد الصعاب
وحتى المصايف ديونها هباب
وناس فى مارينا وتانية معرّقة
يا حرّ أغسطس كفاية بقا
*****
عشان الغلابة بكفر ومدينة
وكل اللى يحرس وإيده أمينة
وكل الصحارى وأهلى فى سينا
وكل اللى نفسه البلاد ترتقى
يا حرّ أغسطس كفاية بقا