يا اهل الوطن
()()()()()()
الوطن
وطن فى المدى
الوطن
وطن فى الخيال
الوطن
نبضة فى قلب المبتدا
مش بس صوت
وقت السكوت
ولا رنة الألحان فى غنوة
ولا صوت عقيم من غير صدى
الوطن مش صورة حلوة ملونة
فين اللى شايفين الوطن
إعلام وبوق
من كتر ما تاهت أحلامنا
بقينا نحلم
ازاى نعود
تانى ونحلم
بالمحال
الوطن
مش كلمة خايفة أو جبانة
الوطن
عايش فى قلب وريد صبانا
الوطن يا مؤتمن كلمة عدالة مش خيانة
الوطن لما بتلقى الشمس
بتصبح عليك
مش عايزة منك أى شئ
غير ابتسامة
الوطن
قلة وضلة
تحت شجرة ف حينا
حكاوينا عنه تلمنا
والحب مرشوق فى الجدور
وان يقسى مرة أو نسى
بتفكره دعوة صبية فى المقام
بتفكره ريحة البخور
الوطن
مش نص ضلمة ونص نور
الوطن مش ميت طابور
ولا بنت عايقة تشبه الناس فى القبور
الوطن يا اهل الوطن
معنى ومغنى وملحمة
مش بس نعى وتوب سواد
على ملطمة
الوطن لو يوم تضيع يجرى عليك
ومهما تبعد يلتقيك
فاتح دراعه بالأمل
فاتح عيون الشوق عليك
الوطن ..مش إبن عاق
ولا طفل عاصى لوالديه
الوطن
انت وانا
مش صفحتين فى كتاب تاريخ
م الاصفرار فوق الرفوف
صابهم عفن
الوطن عمره ماكان يتقاس تاريخه
بالسنة
الوطن أكيد ..أكيد
مش احتمال
الوطن مش ريحة الزمن المعتق
جوة تجاويف الحجر
الوطن كائن وحى
مش جنى بيحضر
بشر
الوطن يبقى ف خطر
لما بنقلب الأمور
ونمشى على كل السطور
من الشمال
مش م اليمين
الوطن مش شكل عمة
وشكل شيخ
ما لهمشى دين
الوطن صوت الآدان
دعوة إيمان
بتلم كل الطيبين
بتلم كل الصالحين
....................
بـــقــــلــــــــــم ا لــــشـــــــــا عـــــــــــر
أ بــــــو عــــمــــــــــا ر ا لـــمــــصـــــــر ى
السبت مارس 26, 2016 1:34 am من طرف حسين محمد
