عـِـشـقـِك فــُجــــــر ابوعمار المصري

..........
ومش عارف أروض قلبى
على بُـعدِك
ولا قادر أدوق الحب من بَـعدك
وايه الحل ؟
يا مالكة القلب م السِلسال
لحد جدود وكل حفيد
ونافخة فيَّا من روحك
وساقية الطين مع الصلصال
بسم وريد
يا واخدة النبضة من دقاته
تغزلى بيها شمس وضل
يا زارعة الآه ما بين دمى
وبين لحمى وبين عضمى
مع ذلك أنا عاشقك
يا ست الكل
وجربت الغرام فى عيون
شبه عينك
ومهما اسكن وجواهم
بادور بس فين فينك ؟
ألاقى روحى متغـرّب بلا رمشك
ونن البوح
وباخدك جوة جوايا
تسافرى قـَبلى ومعايا
ونتعاشِـق ونترافِـق
وسكة خطوة المسافات
تطول تقصر
وكل الحلم متفسَّـر
لفين ما نروح
واحلف تانى ما انا عاشقك
فسيبى القلب يتمطع
ويرسى ف بر غير برك
ما انا وياكى متقطع
سيبى لى حتة من نفسى
ولو حتى انا ف بعدك
هادوق مرك
ما انا شاربه لحد كعانى
متبلبل فى أحزانى
واديكى واقفة تتهامسى
على جروحى
لا عايزة تريحى وجعى
ولا مرة نشف دمعى
وسايبة الكل ينهشنى
عيون الديب تفتشنى
تنغـَّز قلبى وضلوعى
وانام راسى على كوعى
وصورتك مالية تفكيرى
واراجع كل حساباتى
واغالط نفسى وضميرى
والاقى ألف عذر وعذر
يا عاشقانى على كيفك
وهاجرانى على راحتك
يا عاشقانى بكل الـفـُـجر
وانا الحارس دفا عنيكى
يا ست الرحمة فوق العدل
بلا عدلك ولا رحمات بتتنزل
على القلب اللى بيعود لك
خلاص روحى
ما انا رايح أنا منك
ما هيش فارقة
ولا عشقك هيشفع لى
ولا غيرك هينفع لى
ما قلبى خلاص
شرد منى
وحالف تانى ما راجع لى
كرهت النبضة فى غرامك
كرهت أعد أوقاتى
بدمعى ولا بآهاتى
وكنتى انت يا غالية الفرض
وغيرك سنة ما تكمل
وصاين كل أحلامك
وصايم كل أيامك
ولا فايدة
فى قسوة قلبك المجنون
ما هو مليان بعشاقك
لكن برضو بنفس المنطق المقلوب
عشقتينى
عشقتيهم
بلاها العشق يا بهية
بلاها الحب بالـدّيـَّــة
سيبى لى نظرة فى عنية
تطل عليكى لو م القبر
حرام والله عشقك فـُـجر
...............
بـــقــــلـــــــم ا لـــــشـــــا عــــــــر
أ بــــو عـــمـــــــــــا ر ا لـــمـــــصــــــــــــــر ى