اسقاط ع يوم قديم ــ (3 ) .. الكوشة
ـــــــــــــــــــــــــــــ لـ / أحمد البدرى على
صَاحب تراب الطين
من يومه يعجن هم
كل الصغار لاعـبين
ووحده فـَرشْ و لـَمْ
يدق ف ( الحـُمرة َ )1
يكربل (الدمسة )2
يرسم ع المعـَجـَنَه
كام حلم فوق الطين
و( الطورية ) بتقلب 3
( خرط ) و(دمس ) و (تبن ) 4
و (حـُمرةْ ) كل الوجع يا سنين
والميه من قلب النخيل حاضر
طارح الضلة ع المساكين
وع (الحـَضْارة) بيغنى 5
على ( الحـلوه ) وع اللى جاى 6
يا (كنكة ) شاي بتغلى القلب 7
على جمر الحطب وجريد
سوادك مـُرك ولا سكر
يحليى العـُمر متعكر
كما الميه ف بـِركة طين
وياخد صورة للـ (قالب )8
وخشباتهُ و للـ (فرشين )9
شبعت المعجنه م الميه و (السبخات)10
ومن تانى تتقلب و (تتمرس )11
كيف العجين ف الطين
نفرش رماد العيون
ع الأرض تحرقنا
بطرح حمول الطين ع الفرش
وأجـُره وأشيله
يمشى كما الأيام ع ضهره
عكس الشمس
تتولد قوالب ضحك من أيده
و نعدى اليوم فى كام نكتة
ساعات ضحكة وكام موال
وبعد يومين تلات تيام
نوقف كل م كتبنا
ع الاحلام
وكوم ( شنفان )12
نعد الهم ب ألف
كام قالب وفاضل كام
هنبنى بكرة ف الكوشه
نحضر ( فحم ) من لونا
(مازوت ) وفرحة تجمعنا
نلف الليله كل الحى
وقيد (الجلة ) نشريها 13
حطب رومان حطب بركان
نحط الصبح كراسيها
ونعالي فيها البنيان
تلات ادوار ورش مازوت
كمان دوين ورش الفحم
خلاص بالحلوه نلطسها
وعود كبريت نخلصها
نولع فيها نحرسها
(أمينه ) ( الكوشه )
غدوتها لا (مخروطه )
لا جوز خرفان
أحمد البدرى على
أحمــــــ بدران ــد
ــــــــــــــــــــــ معانى المفردات
1ـ الحمره : مايتنج عن الطوب الأحمر بعد تكسيرة وطحنه وغربلته
2ـ الدمسه : مخلفات الماشيه من الأغنام
3ـ الطورية : الفأس
4ـ خرط : التراب .5 ـ الحضارة : أله يدوية تخرج المياه من بطن الارض . 6ـ الحلوة : مزيج من التراب والدمس والتبن
7ـ كنكه : الكنكه وعاء يصنع به الشاى
8ـ قالب : وهو الأداه التى نصنع بها الطوب وتصنع من الخشب على شكل مستطيل بمقياس معين
9ـ فرشين : مثنى فرش والفرش أداه لحمل الطين ويصنع غالبا من سعف النخيل .
10ـ السبخ : الصبخ وهو مخلفات المواشى من الجاموس والابقار
11ـ تتمرس : كثرة العجن فى الحلوة لتصير متماسكه اكثر
12ـ شنفان : مثنى شنيف وهو وعاء مصنوع من حبال الليف بطريقة معينه على شكل مربعات وهو مخصوص للجمال لتحمل فيه كافة الاشياء
13ـ الجلة :وقيد يصنع من مخلفات المواشى ع شكل دائرة
السبت مارس 26, 2016 1:34 am من طرف حسين محمد
