نزيف أحلام
()()()()()()
تلف الدايرة من تانى
وبالقانى
على الخط الواص ل بيننا
واقف وحدى
أمد إديا لخيالك
ويرفضنى
أمد شعاع لشريانك
عشان اوصِـل...بيقطعنى
قطعتى كل خيط واصل
وانا تايه
ما بين نفسى
وبين قلبى
وباحلم ...إمتى نتواصل ؟
معاندة خطوتى السكة
ألف وادور
تاخدنى الدايرة لعنيكى
ألأشوف ضحكة
وقلبى يطير من الفرحة
ركبت بساط رموش عينك
ياخدنى لفوق
واقول بكرة ..خلاص قرب
وراجعة لى
وتصغر دايرة الأحزان
بقت نقطة
وتصغر دنيتى علىَ
ما بتسعنيش
أكلم كل شئ جنبى
أكلم حتى إحساسى ...وأنفاسى
ويرقص نبضى مع دمعى
على لحن الهوى ف قلبى
واطير اسبق
حمام رايح يغنى لك ..
ويسبقنى
وتظهر صورتك الوردى
ويسبقها على السكة
شعاع فضى
يمد جسور لشوق عينى
يطمنها
ولا يطمنى ..غير لمسة
مابين قلبك وبين قلبى
وتعلى ف قلبى دقاته
لا عارف اروح لحضن عنيكى
ولا قادر ...أنا استنى
وفارد لك جناح من شوقى
متشوَّق
واقرب من شعاع نورك
ألاقى النظرة مش لىَّ
واتارى الضحكة مش لىَّ
أبُـص بخوف شمال ويمين
نزيف أحلامى ..يملا بحور
سؤال خدنى معاه ويدور
ويرسى ف مركز الدايرة
لمين الضحكة
والنظرة ف عنيكى لمين ؟
ألاقى صورته فى عنيكى ..
بتهزمنى
وتتحَـدَّى
ألملم فى بواقىَّ
وتحضن دمعتى عينىَّ
ويحضن قلبى أحزانى
تاخدنى الدايرة من تانى
هنا مكانى
فى أبعَـد ركن فى الدايرة
.........
بـــقـــلـــــــم ا لــــشـــــا عــــــــر
أ بــــو عـــمـــــــــا ر ا لـــمــــصــــــــــــرى
السبت مارس 26, 2016 1:34 am من طرف حسين محمد
