....يعني ايه مجنون
مجنون........أنا
وجناني مش عادي
كأني طير ف السما
وكل الدنيا بلادي
......
مسافر جوا نفسي
ومطرح ما ترسي ترسي
بكرة يشبه كتير أمسي
ونفس الحلم عايش قصادي
............................................
ياحبيبتي أصل السفر
مش قطر علي رصيفه ننتظر
ولا طيارة ورحلة للخطر
ده قلب مسافر علي ميعادي
.....
عارفة الجنون في الحب
بيخلي طول البعد قرب
وتتلاقي قلوبنا ف سكة ودرب
ولو بيننا بلاد اشوفك قصادي
.......
بالخيال بالقاكي جنبي
وأقرب وأشكيلك حبي
وتقربي وتحسي بقلبي
والقاكي ف كل حياتي
........
بيننا طريق صعب يقرب
وكل واحد فينا متغرب
وصعب من عشقنا نهرب
يبقي الجنون ف حبنا عادي
......
خليني حلم تنامي تلاقيه
خليني عمر وعيشي بيه
وساعة ماتنادي قلبي هتلاقيه
زي ما بأشوفك دايما قصادي
......
هو الهوي ايه غير حلم
نتمني يوم نعيشه علم
ولحد ما ينسانا زمان الظلم
هتفضلي خيال مصاحب حياتي
......
القاكي من السما حبة مطر
القاكي نسمة حب ف سفر
غنوة لسومة ف ليل السهر
حلم في النوم يبقي زادي
.....
مش مهم انتي مين وفين
رسمتك م الشوق والحنين
صورة جوا قلبي من سنين
تستني تبقي حقيقة قصادي
.......
كتبت كل الأسامي فيكي
وبكل اسم ناديت عليكي
عشت حكاوي الحب بيكي
ومهما طال الزمن باحلم بلقاكي
...............................................أيمن بلال
السبت مارس 26, 2016 1:34 am من طرف حسين محمد
